Mato-Manán celebrará as festas na honra ao Salvador os días 8 e 9 de agosto
A parroquia de Mato-Manán, no concello de Sarria, celebrará os días 8 e 9 de agosto as súas tradicionais festas na honra ao Salvador cun programa que combinará actos relixiosos, gastronomía popular e música para todos os públicos.
As celebracións comezarán o sábado 8 de agosto cunha pancetada veciñal e unha queimada a partir das 21.30 horas. A noite festiva estará amenizada pola Charanga de Paradela, que se encargará de poñer o ambiente nunha primeira xornada pensada para o encontro e a convivencia entre veciños e visitantes.
O domingo 9 será o día grande das festas. Os actos relixiosos arrancarán ás 13.30 horas coa misa solemne e a posterior procesión na honra ao Salvador. A continuación celebrarase a sesión vermú, amenizada pola Orquestra Dinastía.
Xa pola noite, a partir das 21.15 horas, a mesma formación musical volverá subir ao escenario para protagonizar a verbena. A xornada contará ademais coa actuación estelar da cantante Pili Pampín, un dos nomes máis coñecidos da música popular galega.
As festas de Mato-Manán volverán converterse así nun punto de encontro para a veciñanza da parroquia e para numerosas persoas que cada ano se achegan ata este núcleo de Sarria para participar nunha das celebracións tradicionais do verán.