Medio Rural executa actuacións de prevención de incendios no distrito forestal IX Lugo-Sarria
A Consellería do Medio Rural está a desenvolver traballos de prevención de incendios forestais en máis de 60 hectáreas pertencentes ao distrito forestal IX Lugo-Sarria. A conselleira do Medio Rural, María José Gómez, acompañada polo director xeral de Defensa do Monte, Manuel Francisco, desprazouse ao municipio do Incio para supervisar o avance destas actuacións.
Os traballos céntranse na mellora de cortalumes, faixas auxiliares e pistas forestais nos concellos do Incio, Friol, Lugo e Samos, cun investimento superior aos 400.000 euros. Segundo destacou a responsable autonómica, estas infraestruturas desempeñan un papel fundamental na prevención dos lumes forestais ao facilitar unha mellor preparación e capacidade de resposta fronte ás emerxencias.
Durante a visita, a conselleira tamén comprobou os labores de mantemento que se están levando a cabo nun dos puntos de auga situados no Incio. Estas actuacións son habituais nesta época do ano e teñen como obxectivo garantir que estas instalacións estean plenamente operativas de cara á campaña de alto risco de incendios.
María José Gómez lembrou que boa parte das tarefas preventivas corresponden aos propietarios dos terreos e montes. Con todo, subliñou que a Xunta realiza anualmente un importante esforzo mediante actuacións executadas polo persoal dos distritos forestais e a través de encargos específicos para reforzar estes traballos.
A titular de Medio Rural incidiu en que a prevención continúa a ser unha das principais prioridades do Goberno galego. Nesta liña, destacou que o orzamento destinado a este ámbito experimentou este ano un incremento do 50 % respecto ao exercicio anterior, alcanzando os 75,38 millóns de euros. Estes fondos permitirán impulsar actuacións como o mantemento de áreas cortalumes, a creación de faixas auxiliares, a mellora da rede de pistas forestais e a realización de queimas prescritas.
Ademais, a conselleira puxo en valor as axudas destinadas ás comunidades de montes para desenvolver labores preventivos e os convenios subscritos cos concellos para a dotación de maquinaria, brigadas e motobombas.
A Consellería do Medio Rural tamén ofrece apoio a propietarios e administracións locais mediante o novo convenio para a xestión da biomasa nas faixas secundarias, subscrito coa empresa pública Seaga. Este acordo conta cunha dotación anual de 25 millóns de euros, o dobre da consignada anteriormente, e busca facilitar o cumprimento das obrigas legais en materia de prevención. Na actualidade, un total de 299 concellos xa solicitaron adherirse a esta iniciativa.
Por último, a Xunta recordou que o prazo establecido pola normativa para a limpeza das faixas secundarias xa concluíu. A partir de agora, colaborarase cos concellos que o demanden nas tarefas de inspección e na tramitación das notificacións dirixidas aos propietarios que non teñan cumpridas as obrigas establecidas pola lexislación vixente.