Melanie regresa ao Festival Internacional de Maxia Vila de Sarria tras conquistar ao público na pasada edición
A organización do XXI Festival Internacional de Maxia Vila de Sarria continúa desvelando o cartel desta edición coa confirmación dunha nova artista. Trátase da ilusionista Melanie, que regresará ao certame despois da boa acollida que recibiu na súa estrea o pasado ano.
Segundo destacan desde a organización, a artista deixou unha fonda impresión entre o público grazas á súa alegría, espontaneidade e calidade sobre o escenario, converténdose nunha das actuacións máis lembradas da edición anterior.
Nesta ocasión, Melanie volverá a Sarria cun espectáculo renovado, no que incorporará novos xogos e experiencias máxicas co obxectivo de sorprender de novo aos asistentes.
O XXI Festival Internacional de Maxia Vila de Sarria celebrarase entre os días 20 e 23 de agosto e seguirá reunindo a destacados ilusionistas nacionais e internacionais nunha cita xa consolidada dentro da programación cultural do verán.