Música, lecer e artesanía protagonizan as próximas citas de 'Verán no Incio'
O Concello do Incio continúa desenvolvendo a programación de 'Verán no Incio', unha iniciativa que reúne durante os meses de xullo e agosto actividades culturais, musicais e de lecer para todos os públicos.
A programación arrancou este mércores, 22 de xullo, co espectáculo 'De aló de onde eu veño...', protagonizado por Caxoto e dirixido ao público adulto, que abriu o calendario de citas estivais no municipio.
As actividades continuarán o vindeiro 29 de xullo, ás 21.00 horas, co concerto do dúo Algo pasa con Mery, unha proposta musical que tomará a remuda na programación de verán.
Xa en agosto, o calendario continuará o 5 de agosto, ás 17.00 horas, coa actividade familiar 'Montamos a praia no Incio'. Posteriormente, o 13 de agosto, ás 20.00 horas, será a quenda do espectáculo Don Gelati.
A programación seguirá o 22 de agosto coa celebración da XVI Feira de Artesanía e Produtos da Terra, unha cita xa consolidada que reunirá postos de artesanía e produtos locais.
O peche do programa chegará o 26 de agosto, ás 22.00 horas, co espectáculo de lume 'Forza Ígnea', da compañía Asacocirco, que porá o broche final ás actividades estivais organizadas polo Concello do Incio.