O ANPA do colexio da Asunción de Sarria organiza ASUNFEST, unha xornada de encontro o 30 de maio
A ANPA do colexio da Asunción de Sarria organiza ASUNFEST, unha xornada festiva que se celebrará o sábado 30 de maio e que nace coa vontade de reencontro entre xeracións, alumnado, familias e persoal vinculado ao centro educativo.
A actividade dará comezo ás 18:00 horas no propio colexio da Asunción, onde as persoas asistentes poderán percorrer as instalacións, gozar dun doce de benvida e realizar fotografías para o recordo. Trátase dun primeiro momento pensado para regresar aos espazos do centro e revivir experiencias da etapa escolar.
A partir das 20:30 horas, a celebración continuará en Meigallo, onde se servirá unha selección de pinchos variados nun ambiente distendido e acolledor. O prezo do menú será de 15 euros para adultos e maiores de 13 anos, e de 12 euros para o menú infantil destinado a menores de 12 anos, incluíndo ambos auga.
A venda de entradas realizarase na secretaría do colexio, de luns a venres en horario de 9:10 a 11:00 horas e de luns a xoves de 16:00 a 17:00 horas.
Desde a organización destacan que ASUNFEST pretende ser unha ponte entre o pasado e o presente, permitindo regresar á infancia a través dos recordos do colexio, reencontrarse con compañeiros e compartir coas familias o lugar no que medraron moitas xeracións. Ao mesmo tempo, a xornada busca abrir o centro á realidade actual das familias, mostrando espazos, rutinas e vivencias do día a día escolar.
A iniciativa está pensada como unha gran reunión da familia Asunción, que inclúe alumnado e antigos alumnos, nais e pais, profesorado actual e histórico, persoal do centro, relixiosas e persoas usuarias do internado, nun espazo de convivencia e creación de novos recordos compartidos.