O aumento dos danos nas pasarelas leva ao Concello de Láncara a estudar sancións económicas
O Concello de Láncara está a valorar a incorporación de sancións para as persoas que se lancen desde as pasarelas das praias fluviais do municipio, unha conduta que continúa producíndose cada verán a pesar da sinalización existente e das reiteradas advertencias realizadas pola administración local.
A medida está sobre a mesa despois de que nos últimos días se rexistrasen varios episodios que volveron poñer de manifesto os perigos desta práctica. Segundo explica o goberno municipal, ademais de comprometer a seguridade de quen realiza os saltos, estas accións tamén están a ocasionar importantes desperfectos nas estruturas.
Entre os danos detectados atópanse elementos das varandas que acabaron desprendidos e caeron ao río, obrigando ao Concello a realizar novas reparacións para garantir o bo estado das pasarelas. Desde o executivo local lembran que estas instalacións foron deseñadas exclusivamente para o tránsito de peóns e non para soportar impactos derivados dos saltos.
A administración municipal tamén advirte de que o leito do río presenta condicións variables e non ofrece garantías sobre a profundidade da auga, polo que lanzarse desde as pasarelas pode ter consecuencias graves para a integridade física das persoas.
Outro dos aspectos que máis preocupa ao Concello é que, segundo sinala, nalgunhas ocasións son os propios adultos os que consenten ou mesmo incentivan que os menores leven a cabo este tipo de condutas, malia o risco que implican.
Co obxectivo de reducir estas situacións, o goberno local está a estudar a regulación existente noutros municipios que afrontan problemas similares para adaptar un réxime sancionador ao caso de Láncara. As referencias analizadas contemplan multas que poden alcanzar os 1.000 euros para quen incumpran a prohibición.