O Club Rítmica Atalaia e o Xirandela clasifican os seus conxuntos para o Campionato Galego
Os oito conxuntos do Club Rítmica Atalaia conseguiron a clasificación para o Campionato Galego tras a súa participación na II Fase da Liga Provincial de Lugo, celebrada na cidade amurallada. O club completou unha destacada actuación que se saldou cun importante número de podios e catro títulos de campión provincial en diferentes categorías.
Na categoría escolar, o equipo de iniciación acadou unha boa participación, mentres que o conxunto benxamín logrou a medalla de bronce. Pola súa banda, o equipo infantil tamén completou unha actuación salientable e o conxunto cadete proclamouse subcampión provincial.
Na categoría de promoción, os resultados foron especialmente positivos, co equipo prebenxamín coroándose como campión provincial, o conxunto alevín logrando a medalla de ouro e o equipo sénior facéndose tamén co título de campión provincial.
Na modalidade de prebase, o conxunto cadete volveu destacar ao proclamarse campión provincial, pechando así unha xornada de excelentes resultados para o club.
CLUB XIRANDELA
Ademais, o Club Xirandela tamén obtivo grandes resultados na Fase Final Provincial celebrada en Lugo, da que regresa con sete dos nove conxuntos clasificados para o Campionato Galego de Pontevedra.
No nivel escolar, o conxunto de iniciación acadou a cuarta posición, mentres que o equipo prebenxamín conseguiu a medalla de bronce como terceiro clasificado provincial. O conxunto benxamín rematou en sétimo posto, o alevín proclamouse subcampión provincial con medalla de bronce, o infantil acadou a cuarta posición e o sénior finalizou en quinto lugar.
No nivel de promoción, os resultados tamén foron destacados, co conxunto benxamín proclamándose campión provincial, o infantil logrando o subcampionato provincial e o conxunto xuvenil acadando a cuarta posición.
