O DHU Vila de Sarria estrea meta na Praza da Vila e incorpora novidades para a edición de 2026
O DHG Team, organizador do XIII DHU Vila de Sarria, deu a coñecer as principais novidades da edición de 2026, que se celebrará os días 11 e 12 de xullo. Entre os cambios máis destacados figura o traslado da meta á Praza da Vila, que se converterá no principal punto de encontro da competición e concentrará boa parte das actividades programadas para participantes e público.
Este novo espazo acollerá música en directo, unha zona gastronómica, a cerimonia de entrega de premios, exhibicións de Dirt Jump e outras propostas destinadas a dinamizar o ambiente ao longo de toda a xornada.
A organización tamén anunciou melloras no percorrido da proba, coa incorporación de novas estruturas e diferentes actuacións no circuíto para facer o descenso máis espectacular sen renunciar ás condicións de seguridade tanto para os riders como para os espectadores.
Outra das grandes novidades será o Dirt Vila de Sarria 2026, que terá lugar o 11 de xullo, ás 19:00 horas, na Praza da Vila, coa participación dos riders Alejandro Bonafe, Marcel Dubau, David Ramos, Saúl Vilar e Miguel Guerrero "Carolo".
Un dos grandes reclamos será a presenza de Alejandro Bonafe, un dos nomes máis destacados do panorama internacional do freestyle. O rider foi distinguido como Red Bull Rookie of the Year 2022 e converteuse no primeiro deportista do mundo en completar un Cashroll Tailwhip to Barspin. Ademais, conquistou en tres ocasións o título anual do Night of the Jumps, consolidándose como unha das grandes referencias da disciplina.
Á cita tamén se incorporará Marcel Dubau, rider con ampla experiencia internacional e recoñecido tanto pola súa traxectoria deportiva como polo seu traballo no deseño e construción de circuítos de Dirt Jump. Ao longo da súa carreira participou en probas de prestixio como o Red Bull Roof Ride, en Polonia; o Crankworx SilverStar e Big White, en Canadá; o 4 Bikes Festival e Winterberg, en Alemaña; así como en dúas edicións de O Marisquiño. Ademais, leva tres anos consecutivos formando parte do equipo de Bienve Aguado no Red Bull Rampage, onde colabora no deseño e construción dos percorridos desta competición. A súa formación como arquitecto técnico completa un perfil que combina a experiencia como rider coa creación de escenarios de competición.
O cartel contará tamén coa participación de Saúl Vilar, un dos grandes referentes do BMX Freestyle Park a nivel estatal. O rider chega a Sarria como actual campión de España absoluto da modalidade e ocupa a posición 45 do ranking mundial e a 16 de Europa, avalando unha traxectoria que o sitúa entre os mellores especialistas do continente. A súa presenza permitirá ao público gozar dunha exhibición de máximo nivel con saltos espectaculares e trucos de gran dificultade técnica.
Outro dos nomes confirmados é Miguel Guerrero "Carolo", rider cunha destacada traxectoria nos principais eventos de freestyle. Entre os seus logros figura a vitoria en O Marisquiño 2022 e o primeiro posto na categoría Best Trick de Eurobike Frankfurt, ademais da súa participación en probas do circuíto internacional Crankworx. O seu estilo persoal e a experiencia acumulada nas grandes competicións converterano nun dos protagonistas da exhibición.
O cartel completarase coa participación de David Ramos, especialista en modalidades como o Four Cross, o Pump Track e o Dirt Jump. O rider ofrecerá unha exhibición marcada polos grandes saltos e trucos sobre dúas rodas, contribuíndo a un espectáculo pensado para todos os afeccionados ao ciclismo extremo.
Desde a organización destacan que a presenza destes cinco deportistas reforza o atractivo do Dirt Vila de Sarria, un evento que cada ano reúne a numerosos seguidores do descenso, o BMX e o ciclismo de montaña e que volverá converter a Praza da Vila nun escenario de referencia para o freestyle.