O Esmorga Fest xa ten data para a súa XI edición en 2027
O Esmorga Fest xa ten data para a súa undécima edición. A organización do festival vén de confirmar que a próxima cita terá lugar os días 12 e 13 de febreiro de 2027, aínda que polo momento non se deron a coñecer os detalles da programación.
A nova edición chegará despois dun décimo aniversario celebrado cun amplo cartel que reuniu algúns dos nomes máis destacados da escena independente. Anabel Lee, Battosai, Beach Avenue, Bum Motion Club, Joe Crepúsculo, Ezezez, La Habitación Roja, Las Dianas, Las Prisas, Mujeres, Oh Hiroshima, ParquesVR, Sara Zozaya e Viva Belgrado formaron parte dunha programación que tamén contou coas sesións dos DJs Cholas, Javier LG, John Axiom e Pálida.
O festival combinou os concertos de pago na sala Litmar con diferentes propostas gratuítas e actividades culturais. Entre elas incluíronse iniciativas dirixidas á cativada e accións vinculadas á cultura e á participación social.
Na súa pasada edición tamén se puido visitar a mostra artística "Cuchillo y espada" e instalouse un posto solidario de complementos, cuxa recadación foi destinada a familias palestinas da franxa de Gaza.
Agora, a organización pon xa o foco na undécima edición, para a que aínda non se coñecen os nomes que conformarán o cartel nin o resto das actividades. O Esmorga Fest volverá así en febreiro de 2027 cunha nova oportunidade para manter a súa aposta pola música independente e a programación cultural.