O Festival Terra Brava presenta o cartel da súa edición de 2026 no Incio
O Festival Terra Brava deu a coñecer o cartel da súa edición de 2026, que se celebrará o vindeiro 15 de agosto no municipio do Incio. A cita volverá converter o encoro de Vilasouto no epicentro da música e da convivencia, cunha programación pensada para todos os públicos.
A xornada arrancará cunha sesión vermú amenizada pola Charanga Bicoia e incluirá tamén xogos infantís durante a mañá e a tarde para que os máis pequenos poidan gozar dunha ampla oferta de lecer.
Xa pola tarde será a quenda das actuacións musicais, nas que participarán o Grupo Lamatumbá, Calle Mambo, La Trocamba, La Sincereza e Xosé Lois Romero & Aliboria, conformando un cartel que mestura diferentes estilos e propostas musicais.
A celebración desta nova edición será posible grazas á colaboración do Concello do Incio, da Deputación de Lugo, da Xunta de Galicia e da asociación As Xeitosas. Ademais, o recinto do encoro de Vilasouto contará con zona de acampada e espazo habilitado para caravanas, co obxectivo de facilitar a asistencia do público e converter a cita nun encontro de música, xogos e comunidade.