O festival Ultreia et Suseia regresará a Sarria do 14 ao 19 de xullo coa súa quinta edición
Os organizadores do Festival Ultreia et Suseia confirmaron as datas da quinta edición do evento, que volverá converter Sarria nun punto de encontro cultural e social durante o mes de xullo. Nesta ocasión, a programación desenvolverase entre os días 14 e 19 de xullo, ambos incluídos.
O festival reunirá novamente diferentes disciplinas artísticas e actividades pensadas para todos os públicos, cun programa no que haberá espectáculos de narración oral, danza, teatro, música en directo, humor e propostas de animación infantil.
Entre as actividades previstas destacan iniciativas xa consolidadas dentro do festival como Danza no Camiño e Camiñografía, nas que está prevista a participación de colectivos como Meigas e Trasgos, Peleriños e Rebuldeira Teatro, entre outras propostas que a organización irá desvelando nos próximos días.
A pasada edición contou coa presenza do actor Luis Zahera e dos creadores de contido Pepe e Lucas, nun programa que reuniu numerosas actividades culturais e unha ampla participación de público.
O festival está organizado por Etiqueta Negra e conta co apoio do Concello de Sarria e da Deputación de Lugo.