O Goberno local de Samos renova os paneis turísticos e actualiza a sinalización do patrimonio local
O Concello de Samos renovou os seus paneis informativos e incorporou novos soportes turísticos grazas a unha achega de arredor de 30.000 euros da Axencia de Turismo de Galicia. Esta intervención permitiu tamén substituír e actualizar diferentes sinais relacionadas cos bens patrimoniais da localidade.
Os contidos ofrecen información sobre a gastronomía, as paisaxes, a olería tradicional e algúns dos principais referentes históricos do municipio, como o mosteiro beneditino, a necrópole de Santa Mariña ou o castro de Formigueiros.
En total, instaláronse once indicadores en distintos puntos, entre eles a zona inferior da Casa do Concello, nas proximidades do centro de saúde e do paseo fluvial, así como nos arredores da abadía. Outros dous paneis colocáronse xunto á muralla, na parte alta da vila, e na contorna da torre do reloxo.
Un dos indicadores está dedicado ás rutas que percorren o territorio, entre as que figuran os itinerarios de Fiz Vergara Vilariño, a Serra do Édramo, O Carballal e o sendeiro fluvial que conecta Samos e A Pontenova. Ademais, o percorrido circular do cenobio dispón dun panel propio. Esta ruta discorre polos arredores deste Ben de Interese Cultural e comeza xunto ao edificio consistorial.
Outro dos soportes, baixo o título 'Samos, terra inspiradora', pon o foco nos escritores que mantiveron algún vínculo co municipio. Entre eles atópanse o padre Benito Jerónimo Feijoo, Ramón Cabanillas e o poeta louzarino Fiz Vergara Vilariño.