O Incio acollerá o vindeiro 31 de maio unha nova edición dos populares Cantos de Taberna
O Incio acollerá o vindeiro 31 de maio unha nova edición dos populares Cantos de Taberna, unha cita coa música tradicional que converterá a vila nun escenario vivo de festa, copla e tradición a partir das 18:30 horas.
A actividade, organizada pola Aula de Música Tradicional do Incio e coa colaboración do Concello, reunirá a varios grupos de música popular que percorrerán distintos locais do centro para levar os seus sons ao público.
Participarán nesta edición as formacións Xampó, Son do Mao, Os Ministreles, Gaiteiros de Goián e Tarabelos do Saviñao, que actuarán nos bares Paradís Rural, O Sarabia e Cantina da Purita, así como na Praza de España, espazos que acollerán a veciñanza e visitantes con música en directo e ambiente festivo.
A xornada rematará cunha foliada libre e degustación de iscos na praza a partir das 21:00 horas, consolidando así esta proposta como un punto de encontro para os amantes da cultura galega, da música en vivo e da festa compartida.