O Lóstregos Lvcvs Moto Club celebra unha ruta e asemblea de socios polas terras do Courel
O Lóstregos Lvcvs Moto Club celebra este sábado, 28 de febreiro, unha xornada de convivencia para os seus socios que combina ruta mototurística, visitas culturais, cocido e asemblea. O percorrido esténdese por distintas estradas das terras do Courel e alcanza uns 120 quilómetros.
A concentración comeza ás 9:30 horas na cafetería As Gándaras antes de iniciar a ruta ás 10:00 horas. O itinerario leva aos participantes desde Portomarín ata o mirador da Adega dos Penedos, pasando por Paradela e facendo unha parada na Fervenza do Corgo, antes de chegar a Samos para visitar o Mosteiro ás 12:00 horas.
Ás 13:00 horas, a ruta continúa cara a Airapadrón, a Ferrería do Incio e O Incio, onde os participantes desfrutan dun cocido no Mesón Sarabia. A xornada remata coa asemblea de socios, consolidando unha cita que combina motor, cultura e convivencia dentro do club.