Deportes

A cita celebrarase do 18 ao 20 de setembro cun amplo programa de rutas, gastronomía, música, xogos populares, sorteos e actividades para os afeccionados ás dúas rodas

O Moto Club Os Mouchos de Paradela prepara para os días 18, 19 e 20 de setembro de 2026 a súa XV Concentración Mototurística, unha cita xa consolidada no calendario dos amantes do motociclismo que volverá reunir en Paradela (Lugo) afeccionados chegados de diferentes lugares.

A programación arrancará o venres 18, ás 18.00 horas, coa apertura das inscricións. A xornada continuará ás 21.30 horas cunha cea moteira e, a partir das 22.30 horas, coa festa moteira, que contará coa actuación de The Rockkens e continuará con DJ. Durante a festa tamén está previsto un sorteo sorpresa.

O sábado 19 concentrará boa parte das actividades. Tras o almorzo das 9.30 horas e a apertura das inscricións ás 10.00, os participantes poderán desfrutar ás 11.00 dunha ruta moteira libre con pinchos. Ás 14.00 horas terá lugar o xantar con pincheo no Mercado Gandeiro, mentres que pola tarde, ás 16.00, celebraranse xogos populares. Ás 18.00 horas chegará o tardeo con TDA, antes da cea moteira das 21.30 e da festa con DJ, programada para as 23.30 horas. Tanto durante o tardeo como durante a festa haberá máis sorteos sorpresa.

A actividade continuará o domingo 20, con almorzo ás 9.30 horas e apertura das inscricións ás 10.00. Ás 11.00 celebrarase unha nova ruta moteira libre con pinchos. A partir das 13.00 horas terá lugar o sorteo de agasallos e a entrega de trofeos, como peche da programación, antes do xantar moteiro das 14.00 horas.

A inscrición inclúe a participación nas actividades propostas, o programa de comidas, os sorteos, a caña de benvida, camiseta, parche e pegatina, ademais de acampada gratuíta con acceso a duchas e participación no sorteo de agasallos.

Os prezos establecidos pola organización son de 50 euros para venres, sábado e domingo, 45 euros para venres e sábado e 30 euros para o domingo.

Con esta nova edición, o Moto Club Os Mouchos aposta por combinar motociclismo, convivencia, gastronomía e festa, convertendo Paradela durante tres días nun punto de encontro para a comunidade moteira.