O obradoiro dual de emprego de Sarria avanza na rehabilitación do Campo da Feira
A sexta edición do obradoiro dual de emprego “Sarria, Camiño de Santiago” continúa desenvolvendo actuacións de rehabilitación e mellora no Campo da Feira da vila grazas a un investimento de 454.500 euros da Consellería de Emprego, Comercio e Emigración.
O delegado territorial da Xunta en Lugo, Alfonso Villares, visitou o recinto para coñecer de primeira man os traballos que se están executando ao abeiro deste programa, que se puxo en marcha o pasado mes de xuño e combina formación teórica e práctica para persoas desempregadas.
No proxecto participan 20 alumnos e alumnas, que ao longo de nove meses adquirirán coñecementos e experiencia profesional en dúas especialidades con demanda laboral. Dez persoas fórmanse en fábricas de albanelería, mentres que as outras dez reciben formación en instalación de elementos de carpintería.
Villares destacou a utilidade deste tipo de iniciativas tanto para os participantes como para o propio territorio. Neste sentido, sinalou que os obradoiros contribúen a mellorar a empregabilidade das persoas desempregadas ao tempo que permiten recuperar e poñer en valor espazos públicos de interese para a veciñanza.
Entre as actuacións previstas nesta edición figura a rehabilitación do pendello do polbo, que se sumará aos cinco xa restaurados en convocatorias anteriores. Ademais, acometeranse traballos de recubrimento da fachada da nave do Mercado Gandeiro, a reforma interior dos aseos públicos e o acondicionamento de diferentes muros do recinto, entre outras intervencións destinadas a modernizar e mellorar a funcionalidade do Campo da Feira.
A Xunta lembrou que actualmente se están a desenvolver 16 obradoiros duais de emprego na provincia de Lugo e que xa se está a tramitar a resolución da segunda convocatoria, que permitirá impulsar novos proxectos durante o período 2026-2027.