O Páramo estrea un circuíto de baloncesto escolar para fomentar o xogo e a aprendizaxe
O Páramo acollerá o sábado 31 de outubro o primeiro Aberto de Baloncesto Escolar XOGADE, unha iniciativa que busca ampliar as oportunidades para practicar este deporte entre os nenos e nenas e dar continuidade á actividade durante toda a tempada. O encontro desenvolverase en horario de mañá e estará aberto a equipos e escolas deportivas das categorías benxamín e alevín.
A proposta pretende ofrecer unha alternativa especialmente pensada para os rapaces e rapazas que están a iniciarse no baloncesto ou que, malia participar en competicións federadas, teñen menos protagonismo debido ao seu nivel de xogo. O obxectivo é que todos poidan participar nun ambiente flexible, amable e con menor presión competitiva, no que teñan ocasión de xogar, aprender e gozar do deporte.
Este será o primeiro dos encontros previstos dentro do Circuíto de Baloncesto Escolar XOGADE, unha iniciativa de carácter mixto e fundamentalmente formativo. O programa está dirixido ás categorías benxamín ou premini e alevín ou mini, e busca facilitar que centros educativos, ANPA, escolas deportivas, clubs e outras entidades poidan ofrecer máis oportunidades de xogo aos seus participantes.
A organización corre a cargo de Carballeira do Páramo C.B., que anima os equipos e entidades interesados a solicitar información e tramitar a inscrición a través do propio club.