O PP de Sarria denuncia o abandono do parque infantil da parroquia de Manán

SarriaXa
A portavoz popular, Carmen José López, amosa a súa preocupación ao respecto porque “pode supoñer un perigo” porque pode xerar incluso “insalubridade”
abandono-parque-infantil-Manan-Sarria
abandono-parque-infantil-Manan-Sarria
15 may 2024

O Grupo Municipal do Partido Popular aprecia “desinterese” no Goberno de Camiña Sarria polos espazos de convivencia nas parroquias do municipio á vista do seu “abandono e desmantelamento”.

É o caso de Manán, onde a herba impide o uso dos elementos de xogo no parque infantil situado ao lado do antigo colexio a onde acoden nenos e nenas a actividades que acolle de forma periódica.

A portavoz popular, Carmen José López, amosa a súa preocupación ao respecto porque “pode supoñer un perigo” porque pode xerar incluso “insalubridade”.

Así, urxe ao Goberno local a actuar na limpeza, roza e acondicionamento dos espazos públicos, tanto parques infantís, como zonas verdes ou outros espazos de lecer. “Xa temos reclamado máis atención a estas zonas noutras ocasións: en setembro do ano pasado e en marzo deste ano”, lembra a popular.

López subliña que “estamos a mediados de maio xa houbo días de tempo e os veciños non poden disfrutar dos espazos públicos que actúan como zonas de reunión”. Nese sentido, cre que “é unha pena que por non levar a cabo pequenos traballos de mantemento os veciños e veciñas non dispoñan destas zonas que están inutilizables pola maleza”.

Os concelleiros populares fanse eco da queixas dos veciños polo estado deste parque infantil e lembran tamén o desmantelamento do parque de Ferreiros onde se “retiraron os columpios hai tempo e aínda continúan sen repoñer, igual que en Belante onde hai un acordo do Pleno para a instalación de elementos para nenos e adultos e a pesar diso continúa totalmente desmantelado a día de hoxe”.