Política

As listas propostas pola Comisión Xestora recibiron o visto e prace do Comité Provincial e deberán pasar agora polos órganos autonómico e federal antes da súa aprobación definitiva, prevista para o 17 de outubro

O PSdeG-PSOE de Lugo aprobou as candidaturas da provincia ao Congreso dos Deputados e ao Senado nun Comité Provincial Extraordinario celebrado no Hotel Torre de Núñez. As listas, elaboradas pola Comisión Xestora, superaron así o primeiro trámite provincial e continuarán agora o proceso interno de validación do partido.

Patricia Otero Rodríguez encabezará a candidatura ao Congreso dos Deputados, na que estará acompañada por Jorge Bustos Atanasio, Eva Blanco López e Ismael Carcedo Gómez, que ocupan os seguintes postos.

Para o Senado, o primeiro titular será César Mogo Zaro, seguido de Ana M. González Abelleira e Roberto Castro González.

O exalcalde de Lugo José López Orozco quedou, finalmente, fóra das candidaturas. Segundo a organización, propúxoselle ocupar o segundo posto da lista ao Congreso, pero a súa proposta era concorrer como número dous ao Senado, por detrás de César Mogo.

Tras o acordo provincial, as candidaturas serán remitidas á Comisión Executiva Galega e, posteriormente, á Comisión Federal de Listas, que emitirán os seus respectivos informes. A aprobación definitiva corresponderá ao Comité Federal do PSOE, que se reunirá o sábado 17 de outubro.
As candidaturas aprobadas polo Comité Provincial do PSdeG-PSOE de Lugo quedan configuradas do seguinte xeito:

Candidatura ao Congreso dos Deputados

1. Patricia Otero Rodríguez, de Monforte de Lemos
2. Jorge Bustos Atanasio, de Lugo
3. Eva Blanco López, de Monterroso
4. Ismael Carcedo Gómez, de As Nogais

Candidatura ao Senado

1. César Mogo Zaro, de O Valadouro
2. Ana M. González Abelleira, de Lugo
3. Roberto Castro González, de Ribas de Sil