Os Esmorga DJ’s poñerán a música á sesión vermú do V Malicounda Teranga en Sarria
Hospitaleros Sin Fronteras anunciou que os Esmorga DJ’s serán os encargados de poñer banda sonora á sesión vermú do V Malicounda Teranga, unha cita solidaria que terá lugar o vindeiro 6 de xuño en Sarria.
A programación musical arrancará ás 13:00 horas cunha selección de temas a cargo dos responsables do coñecido festival Esmorga, que leva unha década enchendo Sarria de música e ambiente festivo. A organización destaca que o público poderá desfrutar dunha proposta baseada en himnos indie, rock alternativo, electrónica elegante e cancións pensadas para cantar e bailar durante toda a sesión vermú.
Desde Hospitaleros Sin Fronteras subliñan que esta actividade combinará música e solidariedade nun ambiente festivo e aberto ao público, consolidando unha vez máis o espírito participativo do Malicounda Teranga.