Continúa a programación festiva do San Xoán 2026 de Sarria este xoves
As festas patronais de San Xoán en Sarria continúan este xoves 25 de xuño cunha programación que enche a vila de actividade desde a tarde ata a madrugada, combinando propostas para público infantil, espectáculos de rúa e citas musicais de gran formato.
A xornada arrinca ás 18:00 horas con pasacalles a cargo das Pampónigas e da Asociación Cultural Peleriños, que percorren as rúas da vila acompañando o inicio da programación festiva.
Á mesma hora, a Praza da Vila convértese nun espazo especialmente pensado para o público máis novo coa celebración da Tarde Infantil, que inclúe a proposta de Trémola Teatro e múltiples actividades como bailes, globoflexia, pintacaras e talleres de manualidades.
Xa ás 19:45 horas, a mesma praza acolle a Hora Máxica con Roberto Lolo, un espectáculo de carácter familiar que combina humor e maxia nun dos momentos centrais da tarde.
A programación continúa a partir das 21:30 horas co inicio da gran verbena no Campo de Rugby, na Rúa Castelao, onde actúan o Grupo Ráfaga e a orquestra New York, encargados de poñer música a unha das noites fortes das festas.
De forma paralela, ás 22:00 horas, a Sociedade Recreativa La Unión acolle a tradicional Cea de Gala, que completa a oferta festiva da noite e dá paso a unha nova verbena coa orquestra Panamá, nun ambiente que prolonga a celebración ata ben entrada a madrugada.