Sarria aproba os orzamentos de 2026 con apoio de Camiña e abstención do PP
O pleno ordinario do Concello de Sarria deu luz verde aos orzamentos municipais para o ano 2026, que ascenden a 14,5 millóns de euros. As contas foron aprobadas cos votos favorables dos sete concelleiros do grupo de goberno, Camiña, mentres que o Partido Popular optou pola abstención. Pola súa banda, PSOE e BNG posicionáronse en contra.
O PP xustificou a súa abstención na necesidade de garantir o pago a provedores e facilitar o cobro de axudas por parte de asociacións e clubs do municipio. En cambio, socialistas e nacionalistas criticaron a falta de negociación por parte do executivo local, gobernando en minoría, e reprocharon a ausencia de diálogo previo para consensuar as contas. Ademais, ambas formacións vincularon a postura dos populares a acordos políticos previos entre PP e Camiña.
No transcurso da sesión tamén se abordaron varias mocións. O grupo municipal do Partido Popular presentou dúas iniciativas que foron aprobadas por unanimidade. A primeira delas centrouse no estado de conservación de varias estradas de titularidade provincial, dependentes da Deputación de Lugo. Os populares alertaron da presenza de fochancas, firmes deteriorados e falta de mantemento en vías como a LU-P-5701, en Céltigos; a LU-P-5714, no seu tramo urbano con problemas no inicio da rúa Xela Arias; así como nas estradas LU-P-5709 e LU-P-5710.
A segunda proposta do PP puxo o foco no abastecemento de auga en Callás de Abaixo, onde veciños e empresas situados na contorna da estrada de Piñeira carecen de conexión á rede municipal, dependendo de sistemas propios como pozos ou captacións. A corporación respaldou tamén esta demanda para buscar solucións.
Pola súa banda, o PSOE levou ao pleno unha moción para adoptar medidas que contribúan a paliar as dificultades de acceso á vivenda, que saíu adiante tras un intenso debate no que se produciron cruces de acusacións co PP e o BNG. Así mesmo, os socialistas propuxeron a actualización do plan de igualdade municipal, nunha sesión que combinou cuestións económicas, sociais e de servizos básicos.