Sarria figura entre as estacións prioritarias no plan da Xunta para mellorar a eficiencia enerxética
A Xunta activou un plan estratéxico centrado na eficiencia enerxética co obxectivo de intervir en 19 estacións de autobuses de Galicia, cun investimento global de 7,7 millóns de euros. Dentro deste programa, seis destas infraestruturas teñen carácter prioritario, entre elas a de Sarria.
Esta primeira etapa das actuacións desenvolverase entre este ano e 2028, cun orzamento estimado de arredor de 3,8 millóns de euros destinado ás estacións consideradas máis urxentes. A iniciativa configúrase como unha folla de ruta para a rehabilitación enerxética destes espazos, coa finalidade de convertelos en instalacións máis eficientes e con mellores prestacións tanto para os usuarios como para o persoal.
Ademais, o plan pretende adaptar estas infraestruturas ás esixencias normativas e ambientais vixentes, ao tempo que busca optimizar o servizo ofrecido á cidadanía. Entre as intervencións previstas inclúense actuacións sobre a envolvente dos edificios, as súas instalacións e os aspectos relacionados coa sustentabilidade.
Neste sentido, contemplan traballos como o illamento de fachadas e cubertas, a renovación de carpinterías, a implantación de sistemas de control solar e a mellora da estanqueidade, así como a instalación de iluminación eficiente, sistemas de climatización baseados en enerxías renovables, ventilación e paneis fotovoltaicos, entre outras medidas.
Desde a Xunta subliñan que este proxecto se integra na súa estratexia para reforzar a eficiencia enerxética e o confort nas instalacións públicas, reducindo a pegada de carbono e avanzando cara a un modelo máis seguro, autónomo e con mellores condicións de servizo.