The Rapants lidera o peche das festas de San Xoán de Sarria no marco do VibraXoán
As festas patronais de San Xoán en Sarria chegan este sábado, 27 de xuño, ao seu punto final cunha das xornadas máis agardadas da programación, marcada pola celebración do VibraXoán, que reúne concertos e sesións musicais no Campo do Río e pon o peche á programación principal das festas.
A actividade comeza ás 18:30 horas cun pasacalles a cargo da Banda da Comarca de Sarria e da Asociación Cultural Meigas e Trasgos, que percorren as rúas da vila dando paso ao ambiente festivo da tarde.
Ás 20:00 horas, a Praza da Vila acolle o concerto da Banda da Comarca de Sarria, nunha das últimas actuacións en formato de banda dentro da programación tradicional das festas.
Xa pola noite, o Campo do Río convértese no epicentro da celebración co VibraXoán, que arrinca ás 22:00 horas coa actuación de Mrs. Fine, continúa ás 23:30 horas co concerto de The Rapants, unha das citas máis destacadas do peche festivo, e prolonga a festa desde a 01:00 horas coa sesión de Duendeneta Dilleis.
Con este evento, Sarria despide oficialmente as festas de San Xoán, aínda que a programación festiva se estende un día máis co Día dos Nenos, con descontos especiais nas atraccións, e coa final do XXXVI Torneo de Fútbol Sala San Xoán, que se disputa ás 19:30 horas no pavillón José Mario González de O Chanto.