Trébol e Charleston Big Band animan a noite deste venres no San Xoán de Sarria
As festas patronais de San Xoán en Sarria seguen este venres 26 de xuño cunha programación que volve encher a vila de ambiente festivo a través de propostas musicais na rúa, actuacións itinerantes e unha gran verbena nocturna, ademais do inicio dunha das citas deportivas tradicionais destas datas.
A actividade comeza ás 18:30 horas cun pasacalles a cargo da Charanga de Paradela e da Asociación Cultural Meigas e Trasgos, que percorren o centro urbano marcando o inicio da xornada festiva.
Ás 19:30 horas, o Paseo do Malecón convértese nun dos puntos centrais da programación coa actuación de A Duendeneta, unha proposta musical itinerante que achega a música directamente á rúa nun formato participativo.
Xa pola noite, a partir das 21:30 horas, o Campo de Rugby da Rúa Castelao acolle a gran verbena coa actuación das orquestras Trébol e Charleston Big Band, encargadas de poñer o ritmo a unha das noites fortes das festas.
De forma paralela, este venres arrinca tamén o XXXVI Torneo de Fútbol Sala San Xoán, que se disputará durante os días 26, 27 e 28 no pavillón José Mario González do Chanto, consolidándose como unha das actividades deportivas máis destacadas da programación festiva.