Un club de lectura infantil e outro para adultos terá lugar este sábado da man de Val de Láncara

SarriaXa
Un club de lectura infantil e outro para adultos terá lugar este sábado da man de Val de Láncara na antiga escola
Club de Lectura Val de Láncara
Club de Lectura Val de Láncara
29 mar 2023

A asociación cultural Val de Láncara organiza dous clubs de lectura, un para adultos e outro para nenos, que comezarán o vindeiro 1 de abril coa presentación da iniciativa.

O club de lectura para público infantil celebrarase baixo o nome de 'Val dos contos' e o de adultos será 'O mirador dos libros'.

A presentación será aberta a todas as persoas que queiran participar a partir das 17.00 horas na antiga escola de Láncara.

A asociación deixará os libros 'As Ramonas', para os adultos, e 'Flis-fli-ris-flás' para os nenos que participen destes clubs de lectura coa condición de devolvelos no prazo indicado e a finais de abril terá lugar a posta en común desas obras.

Obxectivo da actividade

Desde a Asociación Val de Láncara defenden que "os nosos clubs de lectura están abertos a persoas de calquera idade, leremos un libro por mes; rematado o libro xuntarémonos na antiga escola de Láncara para falar de moitos temas ao redor da lectura e compartiremos un café ou chocolate"

Así, din que o obxectivo é "que o club de lectura teña unha importante función social de encontro e intercambio" e din que traballarán por converter o centro nun lugar "onde aprender a ler poesía, ver cine, debatir de problemas de actualidade e interactuar entre os seus membros e así convertir as xuntanzas nun acto social e cultural divertido".

Ademais de deixar os libros, a asociación Cultural Val de Láncara proporcionará cada mes os libros e un marcapáxinas de regalo deseñado para cada libro escollido.

"Con esta iniciativa queremos dar un paso adiante e apostar por un rural activo e dinámico culturalmente".

A Asociación Cultural Val de Láncara, que tamén organiza o premio Ramón Piñeiro “FACER PAIS”, quere traballar activamente para que Láncara sexa un lugar mellor para vivir e disfrutar da cultura.

Club de Lectura Val de Láncara