Vendaval leva a Manán, Sarria, unha noite de cinema portugués con catro curtametraxes
A terceira edición de Vendaval, Mostra de Cinema Portugués, terá unha das súas primeiras citas o martes 25 de agosto en Manán, no concello de Sarria. A Palleira converterase a partir das 22.00 horas nunha sala de cinema para ofrecer unha sesión formada por catro traballos audiovisuais, coa participación ademais de dous dos profesionais vinculados ás obras proxectadas.
A proposta permitirá achegar ao público unha selección de cinema portugués contemporáneo a través de títulos de diferentes anos e autores. A programación arrancará con "Bad for a moment", unha obra de Daniel Soares estreada en 2024.
A continuación será a quenda de "STOP - Salas de ensaio para um materialismo histórico", de Jorge Quintela, realizada en 2025. O propio cineasta estará presente en Manán para acompañar a proxección e compartir a xornada cos asistentes.
A sesión completarase con "Maio", de Claudio Carbone, tamén de 2025, e "Cães que ladram aos pássaros", unha peza de Leonor Teles do ano 2019. A actriz Ana Vilaça participará igualmente nesta cita, reforzando o carácter de encontro entre espectadores e profesionais do audiovisual que promove Vendaval.
A actividade de Manán servirá como punto de partida da programación que a mostra desenvolverá do 25 ao 30 de agosto en diferentes localizacións da Ribeira Sacra. O festival ten a súa sede principal na Casa da Memoria, en Bóveda, pero estende as súas propostas por distintos espazos da comarca co propósito de achegar o cinema de autor ao rural.
Vendaval aposta especialmente por estreitar os vínculos culturais e audiovisuais entre Galicia e Portugal. Nesta terceira edición, o programa combina proxeccións con encontros cos equipos artísticos, conversas, música, formación e outras propostas paralelas. Salvo un curso monográfico impartido pola cineasta Margarida Cardoso, as actividades son de balde.
A mostra conta co patrocinio da área de Mocidade da Vicepresidencia da Deputación de Lugo e busca consolidarse como un punto de encontro arredor do cinema portugués e galego, prestando especial atención ás relacións culturais existentes a ambos os lados da fronteira.