Vilasouto celebrará as festas na honra á Santa Cruz con tres días de música e tradición
A parroquia de Vilasouto, no concello do Incio, celebrará do 2 ao 4 de agosto as súas festas na honra á Santa Cruz, cun programa no que a música, as tradicións e os actos relixiosos serán os grandes protagonistas.
A programación comezará o domingo, 2 de agosto, ás 22.00 horas, cunha queimada popular, que estará amenizada pola actuación do Dúo Eclipse.
O luns, 3 de agosto, os festexos continuarán ás 13.00 horas coa celebración da misa solemne, amenizada por Sarricanta. A continuación terá lugar a sesión vermú, que estará a cargo do Grupo Fortuna. Pola noite celebrarase a verbena, coa música do Grupo Fortuna e da formación PK2.
As festas rematarán o martes, 4 de agosto, cunha nova misa solemne ás 13.00 horas, seguida da sesión vermú amenizada polo Dúo La Mina. Pola noite, o mesmo dúo volverá subir ao escenario na verbena, compartindo cartel cun dos grupos máis populares do panorama musical galego, o Combo Dominicano.
O programa combina tradición relixiosa e música en directo para ofrecer tres xornadas festivas dirixidas a veciños e visitantes, consolidando unha das citas máis destacadas do verán na parroquia de Vilasouto.