A ANPA do CEIP de Samos organiza unha charla en liña sobre novas masculinidades para familias
A ANPA do CEIP de Samos organizará o vindeiro martes 10 de novembro unha charla en liña sobre novas masculinidades dirixida ás familias. A actividade será impartida por Pilar Porral e comezará ás 18:30 horas a través da plataforma Google Meet.
A sesión ofrecerá un espazo para reflexionar sobre a igualdade, a educación e a importancia de promover modelos de masculinidade máis igualitarios, afastados dos estereotipos de xénero.
Esta iniciativa forma parte dos obradoiros de igualdade impulsados pola ANPA, que inclúen diferentes propostas coeducativas para o alumnado, como actividades teatrais, xincanas e publicacións.
Desde a asociación animan as nais e os pais a participar nesta actividade, coa que buscan reforzar a implicación das familias na educación en igualdade.
A charla está subvencionada pola Consellería de Política Social e Igualdade da Xunta de Galicia e financiada polo Pacto de Estado contra a Violencia de Xénero.