Sociedade

Os Xardois, Airiños do Neira e a Asociación Cultural Val de Láncara participarán nunha xornada festiva que arrancará ás 18.30 horas

A Asociación Cultural Val de Láncara volverá organizar este ano a súa tradicional Foliada de Láncara, que celebrará a súa cuarta edición o vindeiro 18 de xullo no lugar de San Pedro.

A cita reunirá a diferentes formacións vinculadas á música tradicional galega nunha xornada festiva que terá como escenario a praza da localidade. Nesta edición participarán o grupo Os Xardois, procedente de Cervantes; Airiños do Neira, de Baralla; así como a propia Asociación Cultural Val de Láncara, entidade encargada da organización do evento.

Entre as tres agrupacións desenvolverase unha xornada dedicada á música tradicional e á convivencia arredor da cultura popular galega. As actuacións darán comezo ás 18.30 horas na praza de San Pedro de Láncara.