A rúa Porvir de Sarria acolle a XXIX Feira de Antigüidades e Restauración San Lázaro
A Asociación de Anticuarios e Restauradores de Sarria organiza a XXIX edición da Feira de Antigüidades e Restauración San Lázaro co apoio do Concello de Sarria, a Deputación de Lugo e a Xunta de Galicia entre o 1 e o 3 de maio.
A rúa do Porvir acollerá durante o evento máis dunha vintena de postos dedicados ás antigüidades, á restauración e ao coleccionismo. Ademais, o evento contará cunha oferta complementaria que incluirá postos de repostería e confeitería artesanal, así como demostracións de artesanía e oficios tradicionais.
No marco da programación, a Xunta de Galicia, a través de Artesanía de Galicia, organizará dous obradoiros de cerámica abertos ao público tanto o sábado como o domingo, en horario de 11:00 a 14:30 horas e de 16:00 a 19:30 horas. As persoas asistentes poderán achegarse á técnica do torno cerámico guiadas polo artesán Carlos San Claudio, ou descubrir o proceso de elaboración de pezas de cerámica de mesa no taller impartido por Nerea Carpente.
A feira completarase cunha variada oferta gastronómica e actividades culturais complementarias, reforzando o seu carácter como cita de referencia para profesionais e afeccionados ao mundo das antigüidades e da artesanía.