A Xunta activa este luns a alerta amarela por calor no interior de Pontevedra e na montaña de Ourense
A Xunta activará este luns 10 de agosto o nivel 1, amarelo, de alerta por episodio de calor en dúas zonas de Galicia: o interior da provincia de Pontevedra e a montaña de Ourense. A medida adóptase no marco do Plan de Actuacións fronte aos posibles efectos das altas temperaturas e tendo en conta os datos facilitados por MeteoGalicia e MeteoSaúde.
Segundo as previsións meteorolóxicas, unha masa de aire cálido procedente do sur da Península Ibérica comezará a entrar en Galicia durante este luns. A súa chegada, xunto coa presenza das altas presións e os ceos despexados, favorecerá un ascenso dos termómetros que será especialmente perceptible entre o luns e o martes.
As previsións apuntan, ademais, a que o episodio de calor poderá prolongarse ata o venres, con especial incidencia nas comarcas do interior da comunidade.
No caso de Pontevedra, a alerta afecta aos concellos de Agolada, Campo Lameiro, A Cañiza, Cerdedo-Cotobade, Covelo, Cuntis, Dozón, A Estrada, Forcarei, Fornelos de Montes, Lalín, A Lama, Moraña, Rodeiro, Silleda e Vila de Cruces.
Na provincia de Ourense, o aviso corresponde á zona de montaña, integrada polos municipios do Bolo, Carballeda de Valdeorras, Castro Caldelas, Chandrexa de Queixa, Esgos, A Gudiña, Maceda, Manzaneda, A Mezquita, Montederramo, Parada de Sil, A Pobra de Trives, San Xoán de Río, Riós, A Teixeira, A Veiga, Viana do Bolo, Vilariño de Conso e Xunqueira de Espadanedo.
A Consellería de Sanidade establece os niveis de risco tendo en conta tanto os datos meteorolóxicos como a posible repercusión das temperaturas sobre a saúde. MeteoGalicia analiza, entre outros parámetros, as máximas e mínimas previstas e a superación dos limiares establecidos, mentres que MeteoSaúde incorpora cálculos baseados na relación entre temperatura e mortalidade das últimas dúas décadas.
Recomendacións ante as altas temperaturas
Sanidade lembra que as persoas maiores de 65 anos, os menores de catro anos e aquelas con determinadas enfermidades ou que toman certos medicamentos presentan unha maior vulnerabilidade ante a calor. Tamén recomenda prestar especial atención ás persoas que viven soas, traballadores e deportistas que permanecen durante horas no exterior.
Entre as principais medidas preventivas figura aumentar a inxesta de líquidos sen esperar a sentir sede, especialmente auga, e evitar o alcol, as bebidas moi azucradas e o exceso de café ou té. Tamén se aconsella consumir alimentos lixeiros, verduras e froitas e extremar a conservación e hixiene dos alimentos.
A poboación deberá procurar permanecer en lugares frescos, ventilados ou á sombra, baixar as persianas durante as horas de maior temperatura e ventilar as vivendas nos momentos máis frescos. Recoméndase igualmente reducir o exercicio físico e evitar as actividades ao aire libre nas horas centrais do día.
Sanidade insiste tamén en que nunca se debe deixar a menores ou persoas maiores no interior dun vehículo estacionado e coas ventás pechadas. Ante síntomas compatibles cun esgotamento grave ou un golpe de calor, a recomendación é solicitar asistencia sanitaria urxente.