Alfonso Villares comproba no Incio o funcionamento da biblioteca móbil da Xunta
O delegado territorial da Xunta en Lugo, Alfonso Villares, destacou a importancia do servizo de bibliotecas móbiles do Goberno galego, A Furgoteca, como ferramenta para impulsar a dinamización cultural nos concellos rurais da provincia. Fíxoo durante unha visita ao municipio do Incio, onde comprobou o funcionamento deste recurso itinerante promovido pola Consellería de Cultura, Lingua e Xuventude.
Durante a súa intervención, Villares puxo de relevo a positiva resposta obtida por esta iniciativa, que conseguiu duplicar o número de usuarios ao longo do pasado ano e que actualmente supera os 2.600 participantes.
A Xunta puxo en marcha A Furgoteca no ano 2023 para ofrecer este servizo en vinte municipios do rural da provincia de Lugo e do sur de Ourense con menos de 20.000 habitantes e sen biblioteca propia. Posteriormente, a comezos de 2025, incorporouse unha terceira ruta que permitiu ampliar a cobertura a outros dez municipios situados na zona occidental da provincia ourensá.
No caso da provincia lucense, o servizo presta atención aos concellos das Nogais, Baleira, Cervantes, Folgoso do Courel, Navia de Suarna, Negueira de Muñiz, O Incio, Pedrafita do Cebreiro, Samos e Triacastela. A través desta biblioteca itinerante, os veciños poden acceder a unha ampla oferta de recursos culturais sen necesidade de realizar desprazamentos, incluíndo libros, películas, música, xogos e publicacións periódicas, ademais de distintas actividades orientadas á promoción da lectura.
O delegado territorial subliñou que este servizo permite levar a cultura directamente ao territorio, favorecendo que a veciñanza poida acceder a este tipo de recursos independentemente do lugar no que resida e garantindo a igualdade de oportunidades.
A ruta que percorre a montaña lucense realiza dúas visitas mensuais a cada un dos dez municipios participantes. Nunha delas, A Furgoteca sitúase en espazos de maior afluencia de persoas, como feiras, mercados, centros educativos, centros de saúde ou instalacións socioculturais. Na segunda visita, o vehículo percorre parroquias e aldeas co obxectivo de ofrecer unha atención máis próxima e personalizada.
A biblioteca móbil continuará o seu percorrido pola provincia nos próximos días con paradas previstas en Triacastela o 28 de xuño, Navia de Suarna o día 29 e Samos o día 30.