As Cavarcas do Incio organiza unha charla sobre prevención de incendios forestais este venres
A Asociación As Cavarcas do Incio organiza unha charla centrada na prevención dos incendios forestais, que será impartida por Eloi Villada, fundador e técnico da Sociedade Galega de Pastos e Forraxes.
A actividade celebrarase este venres día 19 ás 19:30 horas na Casa da Cultura da Pobra do Brollón, nun contexto no que se pon o foco na importancia de municipios como este e Quiroga, que figuran entre os máis afectados polos incendios forestais na provincia de Lugo nos últimos anos.
Durante a charla abordarase o papel determinante que ten a conservación dunha paisaxe ordenada e a xestión axeitada do monte na prevención dos lumes, así como na redución das súas consecuencias tanto inmediatas como a longo prazo.
A organización anuncia ademais que no mes de setembro se celebrará unha segunda sesión, centrada nesta ocasión nas consecuencias dos incendios continuados e no seu impacto sobre a poboación e o medio ambiente, aínda que o lugar de realización está pendente de confirmación.