Jorge Bermúdez e Nicolás Bermúdez gañan o IV Rally de Regularidade Vila de Sarria
O IV Rally de Regularidade Vila de Sarria, organizado por Club Clásicos Sarria, pechou unha nova edición cunha gran participación e ambiente entre afeccionados e pilotos de vehículos clásicos. A competición deixou diferentes vencedores nas categorías PRE80, PRE88 e PRE96, consolidando unha vez máis esta proba como unha das citas destacadas do calendario automobilístico para os amantes dos coches históricos.
Na categoría PRE80, o primeiro posto foi para Jorge Bermúdez e Nicolás Bermúdez, que competiron cun Mini Morris. A segunda posición foi para Diego López e Miky Caldas, ao volante dun Seat 124 Sport, mentres que o terceiro posto recaeu en Luciano P. Duarte e Begoña P. Alfaro, participantes cun Morris Cooper S.
En PRE88, José Manuel Mosquera e José Manuel Ferreiro acadaron a vitoria co seu Audi GT. O segundo lugar foi para Pedro Peteiro e Rubén González cun BMW 325i, mentres que Víctor Grande e Sonia Soto completaron o podio grazas á súa actuación cun Porsche 924S.
Pola súa banda, na categoría PRE96, Adrián Vidal e David Blanco lograron o primeiro posto ao volante dun Renault 5 GT. Vicente Manteiga e Rafa Abelleira finalizaron segundos co seu Alfa Sprint QV, mentres que José Luis Martínez e Pablo Souto pecharon o podio cun Mercedes 190.
Desde a organización quixeron agradecer unha vez máis o apoio recibido nesta cuarta edición da proba, destacando a implicación dos participantes, colaboradores e público asistente, resumindo a xornada cunha mensaxe clara: “un ano máis só podemos dicir grazas”.