Láncara abre as inscricións para as súas actividades de verán dirixidas á mocidade de 8 a 17 anos
O Concello de Láncara presentou a súa programación de actividades de verán para 2026, unha oferta destinada a nenos e nenas de entre 8 e 17 anos que combina deporte, convivencia e lecer a través de dúas iniciativas: o Mundialito de Fútbol Sala e o Verán Campus Xuvenil.
A primeira das propostas será o Mundialito de Fútbol Sala Láncara 2026, que se desenvolverá entre o 29 de xuño e o 31 de xullo en horario de 09.00 a 14.00 horas. A actividade incluirá adestramentos, un torneo mixto, charlas, reportaxes e unha revista especial dedicada á terceira edición desta iniciativa. O prezo establecido é de 16 euros para as cinco semanas de duración e o prazo de inscrición permanecerá aberto do 1 ao 19 de xuño.
Pola súa banda, o Verán Campus Xuvenil 2026 celebrarase do 3 ao 28 de agosto, tamén en horario de 09.00 a 14.00 horas. O programa inclúe actividades deportivas, sendeirismo, andainas, xogos tradicionais, miniolimpiadas, accións de educación ambiental e charlas, entre outras propostas. Neste caso, o custo será de 8 euros por semana e as inscricións poderán realizarse entre o 6 e o 22 de xullo.
Desde o Concello destacan que ambas iniciativas teñen como obxectivo ofrecer alternativas de ocio saudable durante o período estival, fomentando valores como a amizade, a convivencia, a aprendizaxe e o traballo en equipo entre a mocidade do municipio.
A información e as inscricións poderán formalizarse na Biblioteca Municipal de Láncara e a través da sede electrónica municipal.