Meigas e Trasgos de Sarria estreita lazos culturais en Jerez cun irmandamento co Centro de Baile Guadalcacín
A Asociación Cultural Meigas e Trasgos de Sarria participou nun encontro celebrado en Jerez co obxectivo de establecer un irmandamento co Centro de Baile Guadalcacín, unha iniciativa orientada a reforzar os vínculos culturais a través da música, o baile e as tradicións populares.
Durante a súa estancia, os integrantes da agrupación sarriá puxeron en valor a oportunidade de levar o folclore galego máis alá do seu territorio habitual, destacando o carácter singular desta experiencia. Segundo trasladaron, esta viaxe tivo un significado especial, xa que o irmandamento permitiu un intercambio cultural enriquecedor que lles deixou unha fonda pegada emocional.
A entidade tamén quixo agradecer a acollida recibida por parte do Centro de Baile Guadalcacín, ao que recoñeceron a súa hospitalidade e a posibilidade de coñecer de preto o mundo do flamenco, facendo que se sentisen integrados desde o primeiro momento. Do mesmo xeito, expresaron o seu agradecemento a Taida, pola súa implicación na organización do encontro, así como a Almudena pola súa atención e trato durante a visita.
No marco desta viaxe, Meigas e Trasgos tamén desenvolveu actividades no Colexio Albariza, onde o centro valorou moi positivamente o encontro ao encherse de folclore galego. A asociación ofreceu un recital para todo o alumnado, no que a música e a danza tradicional fixeron vibrar aos asistentes, converténdose nun dos momentos máis destacados da visita.
Esta actuación puxo o broche final a uns obradoiros de muiñeiras e percusión galega dirixidos ao alumnado do terceiro ciclo de primaria e dos primeiros cursos da ESO. Desde o centro educativo destacaron o impacto da iniciativa, subliñando que a experiencia permitiu ao alumnado aprender e gozar intensamente da cultura galega, nun ambiente participativo e enriquecedor.