O Alto do Castro celebrará a Romaría dos Catro Cabaleiros cunha xornada de festa, música e tradición o 4 de xullo
O vindeiro 4 de xullo, o Alto do Castro acollerá unha nova edición da Romaría dos Catro Cabaleiros, unha celebración que xunta tradición, música e gastronomía nunha xornada pensada para o encontro entre veciñanza de distintos municipios da contorna.
A programación dará comezo ás 12.30 horas cunha sesión vermú a cargo do grupo Érbedo, que poñerá o ambiente musical á mañá. Xa ás 14.00 horas terá lugar o xantar popular propio das romarías, un dos momentos centrais da xornada, no que os asistentes compartirán comida e convivencia nun espazo ao aire libre.
Pola tarde, a festa continuará a partir das 18.30 horas cunha actuación do grupo Courelouzara, encargado de animar o remate da xornada cun repertorio de baile e música tradicional e festiva.
Durante todo o día, o recinto contará tamén con xogos populares, sorteos e servizo de bar, completando así unha oferta de lecer pensada para todas as idades e para favorecer a participación veciñal.
A organización desta romaría conta coa colaboración dos concellos de O Incio, A Pobra do Brollón, Folgoso do Courel e Samos, que se unen para manter viva esta celebración de carácter intermunicipal e posta en valor do rural e das tradicións locais.