O CEIP San Miguel de Paradela achega a lectura aos escolares cun libro de Estefanía Padullés
O CEIP Plurilingüe San Miguel de Paradela acolleu a presentación de "Cambia o mundo... cambias ti", o novo libro de Estefanía Padullés, escritora e ilustradora cunha ampla traxectoria na literatura infantil que reside no municipio.
Durante o encontro, a autora compartiu a súa obra co alumnado do centro. A alcaldesa de Paradela, Montse Mulet Sar, tamén participou na actividade e entregou un exemplar do libro a cada neno e nena, co propósito de fomentar o hábito lector desde idades temperás.
A publicación aborda os cambios como parte natural da vida e propón aos lectores máis novos unha reflexión sobre como afrontalos. A través desta historia, os escolares poden descubrir a importancia de coñecerse mellor, comprender as propias emocións e aproveitar as novas experiencias como unha oportunidade de aprendizaxe e crecemento persoal.
A iniciativa enmárcase nas accións destinadas a promover a lectura e achegar a cultura aos máis pequenos. Con actividades deste tipo, o Concello de Paradela busca estimular a imaxinación, espertar a curiosidade e favorecer o desenvolvemento emocional da infancia a través dos libros.