O Concello de Sarria recoñece os éxitos do Club Rítmica Atalaia tras unha destacada tempada deportiva
O Concello de Sarria celebrou un acto de recoñecemento ao Club Rítmica Atalaia para destacar os logros acadados polas súas ximnastas ao longo da presente tempada, marcada por importantes resultados deportivos en diferentes categorías e niveis de competición.
Durante a recepción institucional puxéronse en valor os éxitos obtidos polo club, resultado dun intenso traballo desenvolvido ao longo do ano. Detrás de cada medalla e cada novo obxectivo acadado atópanse numerosas horas de adestramento, esforzo, constancia e dedicación, ademais da ilusión das deportistas por continuar progresando e medrando no ámbito deportivo.
Entre os resultados recoñecidos figura o equipo de Iniciación Escolar, que conseguiu a medalla de bronce no Campionato Galego e o correspondente ascenso á categoría Promoción. Pola súa banda, o grupo Prebenxamín Promoción proclamouse subcampión galego, obtendo ademais o ascenso á categoría Prebase.
Tamén destacou a actuación do equipo Xuvenil Promoción, que acadou o título de campioas galegas e asegurou o seu ascenso á categoría Prebase. A estes éxitos sumouse o conxunto Cadete Prebase, que se proclamou campión galego e logrou o pase ao nivel base.
Desde a entidade deportiva destacaron que estes resultados representan o esforzo conxunto das ximnastas, do equipo técnico e das familias, que colaboran diariamente para consolidar e facer crecer o proxecto deportivo.
O club tamén quixo agradecer ao Concello o recoñecemento recibido e o apoio institucional mostrado, cun agradecemento especial ao concelleiro Félix Seijas e ao alcalde Claudio Garrido. Segundo trasladaron, sentir que o traballo realizado e o esforzo das deportistas reciben respaldo e valoración supón un importante estímulo para continuar avanzando coa mesma implicación e compromiso.