O Grupo Xacobeo Sarria organiza unha nova ruta polo Camiño do Mar
O Grupo Xacobeo Sarria organiza para o vindeiro 31 de maio unha nova saída dentro do programa “Coñecendo e disfrutando de Galicia”, nesta ocasión cun percorrido polo Camiño do Mar entre Carragueiros e Abanqueiro, no municipio coruñés de Boiro.
A proposta consiste nunha ruta de 12 quilómetros e de dificultade baixa, que permitirá ás persoas participantes descubrir diferentes praias e paisaxes marítimas da comarca. A organización destaca o atractivo natural do itinerario e a oportunidade de gozar dunha contorna costeira de especial beleza.
A xornada incluirá tamén unha comida de grupo nun restaurante coñecido polo colectivo organizador. Xa pola tarde, as persoas asistentes desprazaranse ata Corrubedo para participar nun “tardeo” nun enclave que a organización define como máxico e inesquecible.
A saída realizarase ás 6:30 horas desde Sarria e ás 7:00 horas desde Lugo. O prazo para reservar praza permanecerá aberto ata o 28 de maio e as prazas son limitadas.
O prezo da actividade será de 47 euros para socios e de 50 euros para non socios, incluíndo transporte, seguros e comida. Para máis información e reservas, as persoas interesadas poden contactar co número 609 027 518.