O IES Xograr Afonso Gómez de Sarria abre as inscricións para a ruta cicloturista en familia
O IES Xograr Afonso Gómez de Sarria vén de abrir o prazo de inscrición para participar na ruta cicloturista en familia correspondente a este curso, unha iniciativa que busca fomentar o deporte e a convivencia entre a comunidade educativa.
A saída está programada para o sábado 2 de maio e desenvolverase, como nas dúas edicións anteriores, maioritariamente por sendeiros e camiños naturais. O percorrido culminará na praia fluvial da Pobra de San Xiao, onde os participantes compartirán un xantar de confraternidade.
A participación na actividade é totalmente gratuíta, aínda que as prazas están limitadas a un máximo de cincuenta persoas, que serán asignadas por rigorosa orde de inscrición. As persoas interesadas deberán formalizar a súa participación na vicedirección do centro.
Para garantir a seguridade e o correcto desenvolvemento da ruta, a organización contará coa colaboración de membros do club ciclista local DHGTeam. Ademais, establécese como requisito imprescindible que cada participante acuda acompañado dunha persoa adulta.
Desde o centro lembran tamén a obrigatoriedade do uso de casco durante toda a actividade. Neste sentido, sinalan que o instituto dispón dun servizo de préstamo tanto de bicicletas como de cascos para facilitar a participación.