O Incio achega a música ás novas xeracións con clases para Infantil, Primaria e ESO
A ANPA do CEIP Ricardo Gasset, en colaboración co Concello do Incio, pon en marcha novas clases de música dirixidas ao alumnado de Infantil, Primaria e ESO. A iniciativa, que busca achegar a música ás novas xeracións do municipio, estará impartida pola Banda de Música da Comarca de Sarria.
As clases comezarán o xoves 8 de outubro e desenvolveranse semanalmente pola tarde. O alumnado de Infantil e Primaria terá as sesións de 16.30 a 17.30 horas, mentres que as destinadas a ESO serán de 17.30 a 18.30 horas.
A proposta pretende ofrecer aos máis novos a oportunidade de ter un primeiro contacto coa formación musical nun ambiente compartido con outros compañeiros, ao tempo que coñecen e se achegan á cultura galega a través da música.
A actividade tamén permitirá que os participantes descubran se teñen interese por continuar a súa formación musical e, eventualmente, facer dela unha afección ou mesmo unha posible vía profesional, seguindo o exemplo doutros artistas vinculados á zona, como Lucía Pérez ou Vizcaíno.