O Incio reúne arredor de 60 postos na XVI Feira de Artesanía e Produtos da Terra
O Incio converterase este sábado nun escaparate da artesanía e dos produtos locais coa celebración da XVI Feira de Artesanía e Produtos da Terra, unha cita xa consolidada que reunirá arredor de 60 postos e que contará cunha programación paralela de música, gastronomía, obradoiros e propostas para diferentes públicos.
A actividade comezará ás 11.00 horas coa apertura dos expositores. Media hora máis tarde poñeranse en marcha os obradoiros abertos de Artesanía de Galicia, que volverán celebrarse pola tarde, a partir das 16.00 horas.
A música e a animación tamén estarán presentes desde a mañá. Ás 12.00 horas chegará A Furgoteca coa proposta "Cocer e cantar", a cargo de Seisdedos, coincidindo co pasarrúas do grupo As Searas.
A gastronomía terá igualmente un papel destacado. Ás 12.30 horas ofrecerase unha degustación de xamón de porco celta por cortesía de Cárnicas Teijeiro. Xa pola noite, ás 20.30 horas, o programa incluirá iscos de porco celta preparados no guizo.
As actividades pensadas para o entretemento continuarán entre as 13.30 e as 17.00 horas con xogos de habilidade elaborados con materiais de refugallo. Ás 14.00 horas realizarase unha pausa para o xantar antes de retomar a programación da tarde.
A partir das 17.00 horas será a quenda da charanga Sorcha, que levará a música ao recinto e contribuirá a animar unha feira que pretende combinar a promoción dos produtos e dos oficios artesáns cunha xornada festiva e de convivencia.
Os arredor de 60 postos participantes permanecerán abertos ata as 20.00 horas, permitindo ao público coñecer ao longo de toda a xornada diferentes produtos e creacións vinculadas á artesanía e ao territorio.
O programa non rematará co peche dos expositores. Despois da proposta gastronómica das 20.30 horas, a XVI Feira de Artesanía e Produtos da Terra despedirase ás 22.00 horas coa actuación do grupo Somoza Trío, que porá o broche musical a unha intensa xornada no Incio.