O PP reclama cubrir as vacantes da Garda Civil en Sarria e na comarca
Representantes do PP da provincia de Lugo reclamaron ao Goberno central a cobertura das prazas vacantes existentes no cuartel da Garda Civil de Sarria e nos postos da comarca, ante a preocupación pola dispoñibilidade de efectivos para atender a seguridade no rural e no Camiño de Santiago.
Os senadores José Manuel Balseiro e Juan Serrano anunciaron o rexistro de iniciativas parlamentarias no Senado para solicitar ao Ministerio do Interior que complete os cadros de persoal. Durante a súa visita a Sarria estiveron acompañados pola deputada nacional Cristina Abades, a portavoz do PP local, Carmen José López, a alcaldesa de Triacastela, Olga Iglesias, e o portavoz popular de Samos, Miguel Gallego, entre outros representantes.
Segundo explicou Balseiro, o cuartel de Sarria ten asignados 21 efectivos, pero actualmente hai cinco prazas vacantes, dúas baixas de longa duración e cinco axentes que, aínda que figuran adscritos ao posto, prestan servizo noutros destinos, principalmente na Comandancia de Lugo. O senador asegurou que, na práctica, son nove os efectivos dispoñibles de maneira permanente para atender Sarria e outros municipios da zona.
Balseiro tamén sinalou que a provincia conta cun catálogo de 1.092 efectivos da Garda Civil, dos que 167 están sen cubrir, o que representa arredor do 17% do cadro de persoal. O senador afirmou que o problema é especialmente visible en comparación coa situación de 2018, cando, segundo indicou, o cuartel de Sarria tiña a plantilla completa.
Desde o PP de Sarria, Carmen José López defendeu tamén a creación dun posto principal da Garda Civil no municipio, aínda que situou como prioridade inmediata cubrir as vacantes existentes. Segundo afirmou, a falta de persoal está provocando unha maior carga de traballo para os axentes e pode afectar ao servizo prestado aos veciños da comarca.
Pola súa banda, a alcaldesa de Triacastela, Olga Iglesias, reclamou máis efectivos para unha comarca rural cun importante tránsito de peregrinos. A popular considerou necesario reforzar a seguridade tanto para os residentes como para as persoas que percorren o Camiño de Santiago.
O portavoz do PP de Samos, Miguel Gallego, incidiu tamén no incremento da poboación durante os meses de verán e na importancia do municipio dentro do Camiño Francés. Por este motivo, pediu ao Ministerio do Interior que cubra as prazas vacantes tanto no posto de Samos como no cuartel de Sarria.