Olimpia López abre unha xornada informativa sobre os fondos do Pacto de Estado contra a Violencia de Xénero
A subdelegada do Goberno en Lugo, Olimpia López, inaugurou unha xornada formativa centrada na xestión e aplicación dos fondos do Pacto de Estado contra a Violencia de Xénero, unha iniciativa orientada aos concellos lucenses e organizada pola Unidade contra a Violencia sobre a Muller.
A sesión, celebrada por videoconferencia, tivo como finalidade ofrecer pautas prácticas sobre o uso destes recursos, aclarar dúbidas técnicas e afondar nos procedementos de xestión e xustificación.
Durante a súa intervención, López salientou a relevancia das administracións locais, ás que definiu como a primeira instancia á que acoden moitas vítimas, polo que considerou imprescindible que dispoñan de ferramentas claras e eficaces para actuar. Neste contexto, lembrou que o Ministerio de Igualdade transferiu aos concellos da provincia de Lugo 1.748.790,72 euros desde o ano 2018.
A subdelegada tamén incidiu na necesidade de reforzar a coordinación institucional, subliñando que a loita contra a violencia machista require unidade, planificación e un uso rigoroso dos recursos públicos.
Ao longo da xornada abordáronse os prazos correspondentes aos fondos do exercicio 2025, cun período de execución comprendido entre o 1 de xullo de 2025 e o 30 de xuño de 2026. A fase de xustificación desenvolverase entre o 1 de xullo e o 30 de setembro de 2026.
Entre as actuacións que poden ser financiadas inclúense o reforzo dos servizos municipais de atención, programas de sensibilización, iniciativas de apoio ás vítimas, formación especializada, elaboración de protocolos e campañas preventivas, así como accións vinculadas aos Puntos Violeta.
López destacou que esta liña formativa se está a impulsar en todo o Estado a través do Ministerio de Igualdade co obxectivo de garantir unha aplicación coherente dos fondos, subliñando que cada actuación debe ter un impacto directo na prevención e protección das vítimas.
A subdelegada concluíu facendo un chamamento a manter o esforzo conxunto entre administracións para que os avances institucionais se traduzan nunha maior prevención e na construción dunha sociedade libre de violencia machista.