Paradela adéntrase no mundo dos morcegos cunha saída nocturna pola desembocadura do río Loio
Paradela achegarase ao mundo dos morcegos cunha actividade divulgativa que permitirá coñecer máis de preto estes animais e observalos no seu propio hábitat. A Noite de Morcegos celebrarase o vindeiro 25 de setembro na desembocadura do río Loio cun programa que combinará formación e contacto directo coa natureza.
A xornada arrancará ás 20.00 horas cunha charla introdutoria sobre os morcegos, na que os participantes poderán descubrir diferentes aspectos relacionados coas características e o comportamento destes mamíferos.
Media hora máis tarde, ás 20.30 horas, e sempre que as condicións meteorolóxicas o permitan, está prevista unha saída polos arredores. Durante o percorrido tratarase de escoitar e observar os morcegos coincidindo cun dos momentos de maior actividade destes animais.
A proposta busca así ofrecer unha oportunidade para achegarse á biodiversidade da contorna de Paradela desde unha perspectiva divulgativa e práctica, permitindo aos asistentes coñecer os morcegos máis alá das crenzas e ideas habitualmente asociadas a estas especies.
A actividade contará con prazas limitadas, polo que será necesario inscribirse previamente a través do correo electrónico robertocp@foresin.es.
A sesión será impartida por Morcegos de Galicia e está organizada por Foresin Consultoría e Enxeñaría Ambiental, co apoio do Concello de Paradela.