Paradela homenaxeará aos seus maiores coa XXXI Festa dos Avós
Paradela volverá dedicar unha xornada aos seus maiores coa celebración da XXXI Festa dos Avós, que terá lugar o domingo 27 de setembro no Centro Polifuncional Xesús Mato Mato. A iniciativa, organizada polo Concello, busca recoñecer o papel que desempeñan as persoas da terceira idade na sociedade e ofrecerlles un día de encontro e convivencia.
A programación arrancará ás 12.30 horas coa recepción de autoridades e persoas convidadas. Ás 13.00 horas chegará a primeira actuación da Banda de Música de Paradela, que poñerá o acompañamento musical a unha celebración que continuará ás 13.30 horas cunha misa solemne.
Un dos momentos centrais da Festa dos Avós será o xantar, previsto para as 14.30 horas e que permitirá reunir arredor da mesa aos participantes nesta nova edición.
As actividades retomaranse pola tarde. Ás 17.00 horas celebrarase un sorteo de agasallos e, media hora despois, ás 17.30 horas, a Banda de Música de Paradela volverá actuar para poñer o broche á xornada.
A convocatoria está dirixida ás persoas maiores de 65 anos empadroadas no Concello de Paradela. Quen desexe participar deberá comunicar previamente a súa asistencia no Concello ou ao pedáneo da súa parroquia.
O prazo para anotarse permanecerá aberto ata o 23 de setembro. Con esta nova edición, Paradela dará continuidade a unha celebración que alcanza xa os 31 anos e que reserva unha xornada específica para recoñecer aos maiores do municipio e favorecer o encontro entre veciños e veciñas.