Peleriños organiza un obradoiro de costura de lensas en Sarria
A Asociación Cultural Peleriños organiza un obradoiro de costura de lensas en Sarria co obxectivo de recuperar e dar a coñecer as técnicas tradicionais de elaboración destas pezas. A actividade estará impartida por Yerai Paz, do Obradoiro O Sarillo, que ensinará ás persoas participantes os métodos e cortes antigos empregados na súa confección.
Durante as sesións, o alumnado poderá aprender as distintas fases do proceso, desde a elaboración dos patróns ata o corte, a confección e a montaxe das lensas, seguindo as feituras tradicionais.
O obradoiro desenvolverase en tres xornadas: os domingos 15 e 29 de novembro e o 20 de decembro. As sesións terán lugar na Casa da Cultura de Sarria, en horario de 11.30 a 13.30 horas e de 16.00 a 20.00 horas.
As persoas interesadas en participar poden solicitar información e inscribirse a través dos teléfonos 693 299 292 e 620 376 329.