O Concello de Sarria impulsa unha nova edición da ludoteca de verán “Ondas de cambio”
A Concellería de Igualdade do Concello de Sarria pon en marcha un ano máis a ludoteca de verán do programa municipal Sarria Concilia, un recurso de lecer e tempo libre dirixido a menores de educación infantil e primaria que, baixo o nome “Ondas de cambio”, busca facilitar a conciliación familiar e laboral das familias sarriás durante os meses estivais de xullo e agosto.
O programa desenvolverase do 1 de xullo ao 31 de agosto nas instalacións do CEIP Frei Luís de Granada e do IES Gregorio Fernández, e estará dirixido a menores empadroados no Concello de Sarria nados entre os anos 2017 e 2022.
En canto aos horarios e servizos, o programa contará cun servizo de madrugadores de 7.30 a 9.30 horas, a ludoteca “Ondas de cambio” en horario de 9.30 a 14.00 horas, e un servizo de friameira, garda e custodia de 14.00 a 15.30 horas.
As inscricións poderán presentarse de forma presencial ou a través da sede electrónica do Concello entre o 1 e o 5 de xuño, como en convocatorias anteriores.